എന്റെ പ്രണയം നിഷേധിക്കുമ്പൊള്‍
നീ..
മണ്ണിന്റെ മാറിലേക്കമരുന്ന
വേരിന്റെ വിരലുകളിലേക്ക്‌ കണ്ണയക്കുക
നമ്മളില്‍ ഉഷ്ണമാകുന്ന
പ്രണയത്തിന്റെ കുളിരവിടെയുണ്ട്‌
ആലിംഗന ചൂടില്‍
വൃക്ഷബീജങ്ങള്‍ ഭൂമിതന്‍ ഗര്‍ഭപത്രത്തില്‍
ഭ്രൂണങ്ങളാകുന്നതും
ഒരു കണ്ണി ഒരുപാട്‌
കണ്ണികളായി കോര്‍ത്തിണക്കുന്നതും
അറുത്തു മാറ്റുന്ന വേരുകളില്‍
നഷ്ടപ്രണയത്തിന്റെ
മഞ്ഞുമലയുരുന്നതും
നീ കാണുന്നില്ലേ
അറിവിന്റെ മുറിവില്‍
ഉപ്പു പുരട്ടുന്നതെന്തിനു?
മനപ്പാഠമാക്കിയ ജീവശാസ്ത്രപാഠങ്ങളുടെ
പൊരുള്‍ തേടിയിറങ്ങുക
ഒരു കുമ്പസാരക്കൂട്‌ നിന്നെ കാത്തിരിക്കുന്നു
എന്റെ അന്ത്യകൂദശയ്ക്കായ്‌
കഴുകന്റെ ,
ക്ഷമയുള്ള നീണ്ട കാത്തിരിപ്പ്‌ ഞാനറിയുന്നു
എന്റെ വരികള്‍ക്കിടയിലെ മൌനങ്ങളെ തീര്‍ക്കുന്ന
അര്‍ദ്ധവിരാമങ്ങളാകുവാന്‍ നീയില്ലെങ്കില്‍
വിട
Subscribe to:
Post Comments (Atom)
No comments:
Post a Comment